Uepisaiti Māngalo

Ne lava hono faka’ilonga’i ‘e he CEO mo e kau ngāue ‘a e ‘Ākiheuhó ‘a hono fakaola e uepisaiti fo’ou ‘o e polokalama tokoni ki he fokoutua Māngalo/Dementia ma’ae kakai Pasifikí ‘i he ‘aho Falaite 26 ‘o Sanuali ni.

Ko e uepisaiti ko ení ‘oku ma’u ai e ngaahi fakamatala ki he Māngalo/Demetia ‘i he lea ‘Ingilisi, lea Tonga pea ‘a mui ange ‘e fakakau mai ki ai mo e ngaahi lea Pasifiki kehe.

‘A’ahi ki he uepisaití ‘i he www.pdm.org.nz

Lomi ‘i he Publications ‘oku ‘i ai e tohi ma’u’anga fakamatala ‘o e Māngalo/Dementia ‘i he lea Tonga.

Fiema’u tokoni kātaki ‘o fetu’utaki ki he va’a Pacific Dementia Māngalo ‘i he fika telefoni 0800 428 492 pe 09 276 6968.

‘Oku mateuteu e kau neesi mo e kau toketā mataotao Tonga ‘i he mala’e ‘o e mo’ui lelei e ‘atamaí ke tokonia ‘a kinautolu ‘oku lolotonga mo’ua ‘i he Māngalo/Dementia mo sivi ha taha ke fakapapau’i pe ‘oku mo’ua ai pe ‘ikai.

‘Oku ‘ikai ngata pe tokoní ‘i he fa’ahinga ko ení ka ‘oku kau ai foki mo honau kau tauhi.

Kātaki ‘alā ka tau fakavetevete ange mu’a ‘a e ngaahi ha’isia ‘oku tatūsia ai hono tokonia ‘a kinautolu ‘oku mo’ua he Māngalo/Dementia ka nau ma’u ha mo’ui ‘oku nonga, tuha mo taau mo e anga ‘etau fakafeangai ‘i he fononga’anga ‘o taimi.

Tau ngāue fakataha ke tokonia si’a memipa hotau ngaahi fāmilí mo e toenga e komiunitī Pasifikí ‘oku mo’ua pe ofiofi mo’ua ‘i he fokoutua ni.

‘Ata: Ko e CEO ‘o e ‘Ākiheuho, Makahokovalu Pailate, Pakilau Manase Lua mo e konga e kau ngāué ‘i he lotu mo hono tofi e keke ke faka’ilonga’i ‘aki hono hifoaki e uepisaiti Māngalo/Dementia.